मालेगाव:
मिळालेल्या माहितीनुसार, मालेगाव महानगरपालिकेत लाचलुचपत प्रतिबंधक विभागाच्या (ACB) पथकाने मोठी कारवाई केली आहे. महापालिका आयुक्त रवींद्र जाधव, त्यांचे स्वीय सहाय्यक (PA) नीलेश पाटील आणि लेखापाल हरीश डिंबर यांच्याविरोधात किल्ला पोलीस ठाण्यात भ्रष्टाचार प्रतिबंधक कायद्यान्वये गुन्हा नोंदवण्यात आल्याचे समोर येत आहे. न्यायालयाने या तिघा संशयितांना दोन दिवसांची पोलीस कोठडी सुनावली असून, आयुक्त जाधव हे अवघ्या दोन दिवसांत सेवानिवृत्त होणार असतानाच ही कारवाई झाल्याने महापालिका वर्तुळात प्रचंड खळबळ उडाली आहे.
काय आहे संपूर्ण प्रकरण?
- मिळालेल्या प्राथमिक माहितीनुसार, एका ४८ वर्षीय कंत्राटदाराच्या पूर्ण झालेल्या विकासकामांचे सुमारे १८ ते २० लाख रुपयांचे बिल मंजूर झाले होते.
- हे बिल आरटीजीएस (RTGS) द्वारे खात्यावर वर्ग करण्यासाठी एकूण बिलाच्या ४ टक्के म्हणजेच सुमारे ८० हजार रुपयांच्या लाचेची मागणी करण्यात आल्याचा आरोप तक्रारदाराने केला आहे.
- सूत्रांनी दिलेल्या माहितीनुसार, या तक्रारीच्या आधारे एसीबीने केलेल्या गोपनीय पडताळणीत १० आणि १३ जुलै रोजी पीए नीलेश पाटील याने लाचेची मागणी केल्याचे, १५ जुलै रोजी लेखापाल हरीश डिंबर याने लाच देण्यासाठी प्रोत्साहन दिल्याचे निष्पन्न झाल्याचे सांगण्यात येत आहे.
- तसेच २४ जुलै रोजी आयुक्त रवींद्र जाधव यांनी बिलाची रक्कम कंत्राटदाराच्या बँक खात्यावर जमा झाल्यानंतर लाच स्वीकारण्यास सहमती दर्शविल्याचे प्राथमिक तपासात समोर आल्याचे समजते.
निवासस्थानी छापेमारी व तपास सुरू:
मिळालेल्या माहितीनुसार, गुन्हा दाखल होताच एसीबीच्या पथकाने तिघा संशयितांना ताब्यात घेतले. यानंतर संशयितांच्या मालेगाव आणि नाशिक येथील निवासस्थानी एसीबीकडून कसून झाडाझडती (सर्च ऑपरेशन) घेण्यात आल्याचे समोर येत आहे. न्यायालयाने तिन्ही संशयितांना दोन दिवसांची पोलीस कोठडी सुनावली असून, लाचलुचपत प्रतिबंधक विभागाचे पथक या प्रकरणी अधिक तपास करत असल्याचे समजते.
About The Author
